楊丞琳（Rainie）一連兩場紅館演唱會，噚晚去到尾場，唱完兩歌首之後，現場歡呼聲不斷，Rainie用廣東話問觀眾：「邊個噚晚嚟睇，有冇人同我一樣聲沙沙，噚晚大家非常之好，太high喇，希望大家可以好似噚晚咁high，畀多啲聲音我聽到。」

Rainie之後又繼續話：「隔咗5年再嚟香港開騷，大家有冇留意我嘅歌，follow我嘅ig、facebook，大家影完相要tag我個名。噚晚4點幾至瞓，今日9點幾起身，心情太開心太興奮，好多人都有tag我嘅相，有啲係好靚嘅相，亦都有好多醜樣嘅相，希望大家可以好開心。」

去到中段時，適逢新年，好多觀眾拎利是出嚟派畀Rainie，佢笑話：「剛才好多人都畀紅包我，我都冇收到，我今晚準備個袋，我知道喺香港有個習俗，新年期間工作會收紅包，噚晚阿嬌叫我紅包唔好唔收，我話收咗100個，佢話太少，唔夠。」

Rainie續繼話：「我要一手拎咪一手拎袋，當大家將紅包放入袋時，順便可以摸摸我隻手。」現場觀眾即起哄，Rainie笑住話：「唔緊要喇！大家可以摸埋我個頭，但千祈唔好打我。」現場氣氛好high，而利是袋亦都好快裝滿，Rainie哈哈大笑話：「其實我唔係真係想要大家紅包，嘴巴說不要，但身體最誠實。」跟住佢叫工作人員幫手喺後面收紅包，再話：「我想專心同大家握手，如果大家手上有紅包，我拎紅包就會忙記握手。」之後佢唱出王灝兒（JW）嘅《矛盾一生》，唱完就話：「今晚，原唱者喺現場，我都好大壓力。」現場即刻有燈光射住JW，JW大嗌：「好聽。」而坐JW身邊嘅係賭王千金何超蓮。

去到encore，Rainie唱出初出道時嘅組合「4 in love」歌曲《一千零一個願望》，唱到一半，三位成員冷嘉琳、張棋惠、黃小柔上台，現場觀眾非常驚喜尖叫。好耐冇合體嘅隊友即刻嚟個大擁抱，跟住繞場向四面觀眾致謝，佢哋話：「很感動，上一次在香港演出是2001年，當時經常來香港做宣傳。台北站有一起演出，反而今次在港可以一起。」小柔接住話：「因為我一直生，生了三個孩子。去年底，丞琳通知我做演唱會嘉賓時，我還在生，到台北演唱會時，才剛生完兩個月，我到台北看她的演唱會。」

Rainie感激話：「她月子未坐好就來捧場，好感動。我還要特別感謝嘉琳，她淡出娛樂圈多年，為了我才上這個紅館舞台。」昔日舊隊友合體，仲要喺紅館，咁難得，梗係嚟張大合照，Rainie話要考考大家嘅默契，擺番當年嘅甫士，但結果證明佢哋已經冇咗默契，Rainie都忍唔住笑話：「沒有，不重要，我們站近一點拍照留念。」Rainie接住又話：「我們有不同的人生目標，大家去做自己想做的事情，都達到自己的目標，20年來我們都很關心對方，年紀越大，彼此友誼越維繫得好，更珍惜彼此間的友誼。」

雖然好唔捨得隊友落台，但無奈之下都要送走，當隊友落台時，Rainie大嗌：「超愛你們。」跟住再講多幾句，佢就忍唔住爆喊話：「剛才好想好好表演，忍着不哭。其實有件事要特別多謝他們，重踏上大型舞台，不是每個人都會答應，要考慮很多原因，很多事情需要協調，過程中千叮萬囑，不要在演唱會期間懷孕，好開心她們都做到，感謝他們的老公忍得蠻好。」唱出最後一首歌時，Rainie話：「唔知下次幾時可以再嚟，好鍾意紅館，台灣歌迷很妒忌，點解可以握到手，大家可以近距離睇到我，好唔捨得離開，希望盡快再見到大家。」

Rainie喺完騷後接受訪問，佢話：「很感動，我堅持要唱完才可以哭，要有使命感好好的唱，但綵排的時候，我是第一個哭出來，她們上升台出場我就已經哭了，整個人都崩緊，很緊張，有很多回憶，需要時間去消化。」Rainie話每個舊隊友嘅目標都好唔同，尤其嘉琳唔願再爆光，生活好低調，要一個完全脫離娛樂圈嘅人，踏上紅館四面台，壓力好大，其實係一件幾恐怖嘅事：「但她們可以打開心房為我這樣做，只因為不想令到我失望，其他兩位心員仍在幕前工作，易於處理演出壓力，但也要排除萬難，好像是安排照顧小朋友。」隊友都做咗媽咪，Rainie下次再喺紅館會唔會都已經做咗媽咪呢？佢笑話：「未有計劃，但我不希望等太久，希望不要像這一次要等5年，上次來時才28歲，現時已將近34，再等5年去到39，我怕體力沒現在好。」最後佢話收到嘅利是，會請工作人員食飯加餸。

精選娛聞，喺晒《娛果》
http://fb.com/appledailyent