周柏豪、張繼聰、雨僑、林敏驄、林盛斌（Bob）噚晚出席電影《西慌極樂：太爆·太子·太空艙》首映。雨僑性感現身，林敏驄（阿驄）一見到雨僑，即刻叫佢「雨巢」，又搞笑話雨僑帶咗雨「雲」來。雨僑被阿驄調戲？佢話：「都係，雖然同佢冇對手戲，但片場成日見到佢，頭先佢已經話我心口閃令令啦！」問雨僑會唔會搵上一個世紀嘅詞聖林敏驄幫手寫歌？佢話：「唔敢，佢係神級填詞人，真係唔敢講。」雨僑話就算阿驄肯寫歌，佢都唔會想俾佢調戲，佢話：「我會反擊，雖然對住佢實輸，好似之前宣傳，阿驄話冇帶禮物嚟，叫觀眾可以落去揸一揸我隻手。」

張繼聰之前餵奶拍片，撞正囡囡張靖嘔奶，阿聰講番呢件事，笑笑口話：「阿女真係好得意，因為之前開劇少時間湊女，所以佢唔係幾認到我，諗住上天台喊住飲啤酒㗎，不過o依家拍完劇多咗時間對住，見到個女望住我甜笑，真係好感恩，亦多謝屋企人同太太好悉心照顧。」

同場周柏豪即刻被問到生B計劃，佢都係嗰句：「未有，順其自然啦！取經，係都搵阿Bob去參考下啦！」