【信里一城】我親眼睇住兩內地女子碌卡900萬元買樓 （小師兄）
蘋果日報 2020/06/03 16:17
地下錢莊小師兄信里一城
小師兄：找換店這門生意就像賭場，永遠都贏。
我是地產經紀，有次賣樓，發展商突然封場，然後看見兩個着拖鞋的女子施施然走入示範單位，沒濃妝、沒香奈兒、沒說「fúwùyuán」，卻在嗌兩盒叉燒飯後，一邊印腳一邊扒飯，滲透出浸淫強國多年的風味。其中一個年紀較大的女子取出一張銀聯卡，遞給發展商職員，碌吓一次、碌吓又一次，最終碌9次，合共900萬元，數目唔算多，事關只是用作買入一個物業的5%細定。
現時規定，香港每天匯款到內地上限是8萬元人民幣，而內地每人每年只有5萬美元額度，如果要匯出數以百萬、千萬甚至以億計的金額，用作購入海外或香港物業，就算借親戚朋友的外匯額度都唔夠用㗎！我問師兄點搞，他說，君不見找換店總有一間喺左近？「特快」、「大額」匯款，明未？不過，內地外匯管理局除了銀行，任何透過找換店匯款出入均是違法，視作地下錢莊。彭博引述國際金融協會（IIF）報告指，估計中國2019年上半年隱性資金流出規模約1.02萬億港元。
師兄幫客做過匯款，手續費由1至5%不等，匯1,000萬港元，手續費10至50萬港元，有次找了間找換店匯幾百萬港元，快到僅15分鐘完成。內地轉錢來香港，一般所知，包括「借人頭」，用盡每人每年額度；「螞蟻搬家」，沒見過提款機被人撳晒啲錢，又霸住部入錢機不停入錢嗎？再來是「平賬」，在內地及香港都有戶口，簡單來講，香港戶口入1港元，撇除手續費，按匯率0.92元人民幣計，大陸戶口入返0.92元人民幣。部份專門經營「平賬」的，面對巨額匯款，會「造」貿易單，達到兩邊戶口balance。
所以找換店這門生意就像賭場，永遠都贏，所以如果話買樓保值，倒不如話做找換店更保值。係喎，乜乜兄弟幾時搞到上市？