「Citibankx投資王擂台賽」星級玩家首兩名鬥得好激烈，星期二又俾鄧建初爬番上頭位，最新資產總值為356萬幾，增長18.8%，至於祝文韜就落番第二名，最新資產總值為353萬幾，增長17.89%，同鄧建初個距離好近。不過，鄧建初捉到文韜路，見文韜收集緊隻中建置地（261），佢又跟入。由於兩位近日都係以炒一格上落為策略，而中建置地本身為仙股，佢郁一格已可有10%，故大家收集博食一格都有肉食，弊啦，文韜你俾人捉到路啦！