家住何文田的陳慧琳（Kelly），跟《蘋果日報》創辦人黎智英是鄰居，2008年黎智英寓所外被縱火、前年大宅被撞閘及放斧頭、到今年初被擲燃燒彈，警方都有聯絡住在對面的Kelly，要求提供閉路電視片段助查，日前Kelly接受本報20周年專訪說：「嗰吓係有啲驚嚇，因為警察好早拍門叮噹叮噹，我好驚嘈醒個仔。」

Kelly不擔心被殃及池魚，從沒想過要搬走，她笑說：「幾好住，黎生都唔驚我點會驚，嚇嚇佢啫，唔會搞到我。而且黎生有兵（保安）24小時喺屋出面，間接益咗我，隔籬又有更亭，簡直三角形保護又免費，有乜事都會幫我，呢啲係香港人精神。」

問對《蘋果》有何看法？Kelly說：「美術做得好靚，排版精釆，最鍾意港聞畫公仔講成件事發生過程，嗰時日本地震畫晒核電廠幾多層，分析晒，好睇得嚟又易明；娛樂版啲相又影得靚啦，睇《蘋果》係好吸引㗎，我覺得媲美日本，我proudof香港有呢一份報紙。」《蘋果》不好的地方呢？她坦言：「狗仔隊好煩，忽然間彈出嚟係有啲驚。」

今年剛巧亦是Kelly入行20周年，她將於聖誕假紅館舉行紀念騷，問到入行這些年來的得失？她說：「得到真係好多，結咗婚觀眾繼續鍾意我，唔使博得太盡，悶又出嚟玩吓，好滿足；失去就係搏殺期真係冇得瞓。」

Kelly在圈中人緣很好，以為沒人對她不好，Kelly卻大爆：「梗係有，篤篤篤篤你背脊，背後講你衰、想你死，自己扮唔知，等日子淡忘，唔會嬲，我行得正企得正。」有否想過退出娛樂圈？Kelly說：「咁又唔得，係我氧氣嚟，我出嚟係透氣，唔覺得做緊嘢，好開心。」


撰文：余燕儀
攝影：郭賢興
服裝：MIUMIU
髮型：GeorgeShum@Alchemy


蘋果20年企硬我敢言
http://20.appledaily.com