麥浚龍（Juno）同謝安琪（Kay）今日在銅鑼灣為服裝品牌概念店開幕儀式做嘉賓，Kay爆Juno原來有個花名叫「幽麥浚龍」，Kay講完隨即笑唔停，佢受訪時話：「其實佢好幽默，改完個名之後，聽到都忍唔住笑，唔係大家想像中咁cool，男人係要有幽默感。」咁老公張繼聰好笑啲定老闆Juno好笑啲呢？Kay話：「Juno係冷笑話，張生係好多肢體動作，大家都搞笑。」

Kay同Juno正在合作一張合輯，二人會分演不同角色，內容講述纏繞一生嘅愛情故事，以音樂串連。早年兩人合唱一曲《羅生門》唱到街知巷聞，好受歡迎，今次再合作有冇壓力？Juno話：「冇，今次同《羅生門》唔同。」

另外提到Kay嘅兒子張瞻已經開學，Kay話：「我個仔好大個，已經係中學生，尊重佢成長，唔想因為我工作緣故令到佢受到好多唔同眼光同壓力，會少啲講關於阿仔事，等佢多啲空間做自己嘢，我同老公都有呢個諗法。」

精選娛聞，喺晒《娛果》
http://fb.com/appledailyent