昨日港股以指數計，相比A股慘跌只屬小兒科，比股票跌幅更加完全睇唔到市況之凶險。隨手拈來幾隻跌幅榜股，已經好有爆煲味道，尤其過去幾個月一直被指貨源過度集中，而累積升幅又過多的喜尚（8179）就急跌53%，國美（493）、人和（1387）都分別在公佈業績後大跌兩成。
此兩股都是基金股且市值唔細，不排除有基金揩嘢，迫住要沽其他股票套現應付贖回。

等埋業績慢慢揀股

連同寶姿（589）昨日停牌要求延發業績，近期已有多家公司業績見光死，不是以往的績佳出貨，而是真正業績走樣兼出問題，莫非真的是市場水緊，業績報表變照妖鏡？此外一大堆股票如永暉焦煤（1733）、創益太陽能（2468）、卡姆丹克（712）等，都各因業績問題而被大舉沽售，春天百貨（331）未出業績先被洗倉，都不是好兆頭。
僅有錄得升幅的股票，大多是已公佈業績，如蒙牛（2319）、恒安（1044）、勝獅（716）等，可見要揀好股票，等業績出咗慢慢睇都未遲，好過預早入市買錯問題股輸寃枉錢。
泰凌醫藥（1011）幾日前公佈業績，去年賺2.34億元（人民幣．下同），每股盈利23.41仙，折合往年及現年PE分別6倍及5倍。
不同於一般半新股，泰凌過去幾年收入非常穩定，分別為27.6億、26.7億及24億元，業績突然走樣的機會不大，毛利率與財政狀況都相當穩定，在亂局中不失為一個穩陣投資項目，亦可享受公司長線增長。
歐陽風