【真‧女神】林穎嫺與李婉華為香港感心痛 希望好事會盡快發生
蘋果日報 2020/06/17 17:19
李婉華林穎嫺
87年港姐季軍林穎嫺在1999年與丈夫Tom Dupont在美國結婚後，定居當地專心相夫教子，雖然她已經移居美國20多年，不過依然關心香港事，去年「6.16大遊行」開始，經常社交平台轉轉發反送中報道同相關訊息，希望令更多人關注事件，她曾直言林鄭真的希望香港死，並佢用英文留言：「對政府感到羞恥！」
身在美國的林穎嫺今日為好友李婉華的網上節目擔任嘉賓，林穎嫺分享在美國生活的近況，對於港版國安法即將通過，她說：「我當然知道，雖然我個人喺美國，但係個心都仲喺香港，我屋企人同好多朋友都仲喺香港，見到香港搞到咁，真係好心痛，雖然而家比較辛苦，但係都希望好嘅事會盡快發生。」婉華亦表示近期開始聽到不少好消息，林穎嫺說：「我聽律師講，嚟緊會有好多措施放寬畀香港人，我哋都等緊好消息。」
婉華和林穎嫺都不約而同地表示，如果為下一代着想，移民是一個最好方法：「而家香港呢個政府，最好係你哋唔好講嘢，只係聽佢哋講嘢，咁做係好唔公平，如果唔講嘢，點可以諗到啲新嘅嘢出嚟，所以要有個好嘅環境培養下一代，而家睇到個情況係好心痛，對細路嚟講，教育係好重要，但係搞到一pat嘢，真係好無辜，要把握機會為佢哋做番啲嘢！」婉華亦說：「呢個家已經變咗，唔再係以前個家，有啲嘢唔係我哋可以控制，如果一件事連黑白都搞唔清，指鹿為馬，都唔想下一代受到委屈。」林穎嫺再說：「最慘係啲小朋友唔知係指鹿為馬，一直以為係啱，所以真係唔得，要跳出去其他地方繼續生活。」