【同Leon對親家?】 雷頌德:外父咁惡,我個仔好大鑊
雷頌德徐榮黎明
雷頌德(Mark)、徐榮同囡囡包包今日去到海洋公園出席「親親動物月」同海洋公園保育日啟動禮,Mark仲為佢哋嘅歌舞劇《威威列車奇遇》作曲,嚟緊Mark仲會同海洋公園合作,推出3D動畫,問到酬勞係咪好高?Mark就話:「唔好理,最緊要質素好好。」係咪政府豪派3億畀海洋公園令資源多咗?Mark就話:「係,係,想做啲好嘢出嚟。」佢仲話作呢啲卡通歌都有畀囝囝審批先,佢哋鍾意嘅話自己信心都大啲。
提到老友黎明(Leon)就快榮升老竇,Mark笑話:「遲啲帶埋嚟玩,我諗佢就嚟做爸爸一定興奮嘅,我準備做爸爸時都係興奮同開心。」問到買咩賀禮?Mark就話知道仔女先:「未諗到,大家都戥佢開心。」問Mark會唔會分享啲育兒心得畀Leon?佢話:「冇,佢咁勁,話生就隨時生。」問到如果Leon生女,會唔會考慮對親家?Mark搞笑話:「唔好嘞,外父咁惡,我個仔做錯事就好大鑊。」Leon唔係只係鍾意講金句?Mark就笑話怕個仔聽唔明。
另外,徐榮帶埋太太同包包出席,支持環保同動物保育,徐榮話:「好多動物畀人類製造出來的垃圾害得好慘,影響成個生物鏈,所以我都想盡綿力去做環保!」 佢日常都好注重環保,教仔女少用飲管同少用飲品杯蓋,自己亦會帶飯盒返工,佢話:「我盡量唔開熱水爐,不過年紀大試過凍病咗,夏天減少開冷氣,小朋友出下汗都係好事!」
精選娛聞,喺晒《娛果》
http://fb.com/appledailyent