改編自韓國同名人氣漫畫、由男團ASTRO成員銀優及女星林秀香主演嘅JTBC新劇《我的ID是江南美人》（江南美人）近期喺韓國熱播，劇集日前播出嘅第12集仲創下收視新高，港劇迷可於Viu同步追劇。《江南美人》上集講到偽女神趙宇麗為做戲畀林秀香睇，特登喺對方面前攬住銀優，造成銀優及林秀香之間嘅誤會，銀優亦立即向林秀香表白，但仍遭對方拒絕。

劇組今日公開咗呢幕戲嘅拍攝花絮，拍攝當日與劇情一樣都係落緊大雨，趙宇麗、銀優、林秀香率先進行排戲，但就有唔少劇迷發現，趙宇麗排戲途中休息時仍攬住銀優，此舉令唔少入戲嘅粉絲都嬲嬲豬，趙宇麗隨即對住鏡頭笑言：「只係演戲，我現實中與秀雅(劇中角色)唔同㗎。」開拍時，因為劇情講銀優要追上去向林秀香解釋，所以趙宇麗就要畀雨淋，但當導演嗌CUT時，行開咗幾步嘅銀優立即衝返轉頭幫趙宇麗擔遮擋雨，暖心舉動獲粉絲大讚。至於銀優、林秀香戲外依然甜蜜，林秀香主動幫銀優披毛巾，以免對方淋病之際，銀優亦幫林秀香撥開遮住眼嘅頭髮，令粉絲睇到心動。

精選韓流，喺晒《娛果》
http://fb.com/appledailyent