當年今日
關於我們

接獲大工程
股路縱橫:大慶盈利有保障

蘋果日報 2003/06/26 00:00


大市在9600關口爭持,成交縮到只得63億元,在聯儲局議息前,市場觀望氣氛好濃厚。無論美國減唔減息,減幾多息,大戶都會盡力維持在9600水平結算,呢個位對佢哋最有利。
國企係03年投資必選對象,大市調整,唔少散戶計數賺錢落袋,但基金同大戶嘅買盤就未有停過,呢一兩日,主力係買住鋼鐵股同中石油(857)。基金對3隻鋼鐵股都睇得好好,論公司管理質素,鞍鋼(347)排第一位,論PE低就要數重鋼(1053),但基金估計馬鋼(323)日後嘅升幅就最大,所以,佢哋揸得最重亦係呢隻。

海化超購傳逾30倍
海域化工(2882)認購踴躍,市場傳聞超額逾30倍,母公司海域集團(1220)卒之有表現,高收1.42元,升5仙。呢4個月來,海域走勢形成大圓底(以除息計算),今次突破頂部阻力,照度上去,起碼可見1.65元。
03年度(12月年結),海域每股盈利估計有31仙,派息10仙,即使股價升上1.65元,預測PE仍只係5.3倍,息率有6厘,仍然好吸引。
大慶石化(362)最近接到單大工程,噚日高收0.38元,升7%。呢個多月,大慶由0.25元起步,升到上0.385元先打橫行,形成三角形,噚日升勢再起,一衝破0.385元阻力,量度升幅0.47元。大慶近期升幅雖大(近50%),但股價長期偏低,升咗咁多,仍未上番合理水平。
大慶剛簽訂杭州灣大橋第一期工程防腐塗料合約,總值3000萬元人民幣,今年第3季開始供貨。杭橋全長36公里,建費約118億元,防腐工程約佔10%,大慶籌備競投餘下工程。
集團生產潤滑劑和防腐塗料,後者將成為未來重點發展項目,預期到05年可佔營業額5成。大慶為內地3個指定大型機器專用潤滑油供應商之一,亦為5大汽車生產商其中兩家提供汽車專用潤滑油,另與渤海重工葫蘆島造船廠合作生產防腐塗料,預期今年第3季投產,產量15000噸,專供4家大型造船廠之用,生意和盈利都有保障。03年度(6月年結),大慶盈利料9000萬元,每股盈利10.2仙,以石化股仍偏低的6倍PE計,股價可見61仙,預期升幅有6成。
郭兆誠