《2018亞洲小姐總決賽》今日喺馬來西亞嘅「又見馬六甲」劇院舉行，16位來自香港、大中華及海外賽區嘅候選佳麗，角逐2018亞洲小姐嘅冠軍寶座。今屆總決賽搵咗大馬歌手茜拉擔任開場嘉賓，Gin Lee(李幸倪)擔任壓軸表演嘉賓。16位佳麗逐一出場，在答問環節上，10號王路瑤狀態大勇，好流暢咁自我介紹，而且仲即場表演拉丁舞。

雖然香港賽區冠軍梁雪瑤被視為熱門，可惜最後大熱倒灶，冠軍係來自大陸河北賽區、現年18歲嘅10號王路瑤奪得，佢同時仲係最上鏡小姐同完美體態大獎嘅得主，成為三料冠軍。亞軍係來自阿聯酋賽區、現年24歲嘅9號李德鳳，季軍就係由來自山東賽區、現年20歲嘅12號宿婧一。今屆亞姐冠軍嘅權杖總值超過1000萬港幣，大會話創下健力士紀錄，鑲嵌最多寶石嘅權杖。

其後三位出爐亞姐都異口同聲話心情仍好激動，冠軍王路瑤話喺今次比賽已經將自己最好嘅一面表現出嚟，相信今次係因為台上嘅自信同大方，令到佢贏得冠軍。亞軍李德鳳就話覺得自己嘅表現唔係太好，可能因為年紀大，吸引了某啲評判嘅口味，季軍宿婧一就話唔係好相信自己會得獎。至於會唔會加入娛樂圈?王路瑤同宿婧一就話希望以學業為重，反而李德鳳就話希望見識多啲世界，會留喺香港發展。

雖然捧蛋而回，不過香港賽區嘅亞軍張右雨同季軍林孜沫心情似乎未有受影響，喺慶功宴上表現興奮，張右雨話：「我冇唔開心，過程最緊要，可以到韓國受訓，又可以去馬六甲演出，已經好滿足。」佢仲話希望加入娛樂圈。

精選娛聞，喺晒《娛果》
http://fb.com/appledailyent