58歲余安安後生時好靚，76年拍攝大台改編金庸名著《書劍恩仇錄》劇集，扮演小說裏面最靚嘅「香香公主」角色，自此「香香公主」成為安安嘅代號；42年後，「香香公主」安安遇上「香香」岑麗香，兩人分別在社交網晒合照，香香留言：「今晚拍攝我真lucky囉！可以同original香香公主同場！好開心呀！當然要拍照啦！」

33歲嘅岑麗香在劇集《巴不得媽媽》扮演花名「香香公主」嘅香乃馨，私下大家都叫佢做香香，對於香香公主遇上香香公主，香香回覆《蘋果》表示：「遇上安安姐時好多開心，因為一直好多人叫我呢個花名，安安姐嘅香香公主代表好靚同好有仙氣角色，咁我喺《巴不得媽媽》角色代表『香咗嘅香』，即係輪盡，哈哈哈，所以遇到仙氣嘅香香公主，我好開心呀！」

問到有冇睇過安安姐版本嘅《書劍恩仇錄》劇集？香香坦言：「知道係好出名嘅小說，但套劇就未睇過，唔知喺邊度搵嚟睇，不過，我都知道香香公主嘅資料，例如係一個古裝角色，同埋佢食花啦，所以好香啦！一直以嚟香香公主係我喺香港嘅花名，終於可以遇到正版香香公主，好似更加明白自己identity嘅感受，咁講好似好誇張，但真係有少少呢個感覺㗎！」

精選娛聞，喺晒《娛果》
http://fb.com/appledailyent