小初前日聽完經紀陳分析過經紀合作社（8123）後覺得有道理，隻股噚日掛牌，小初冇手多多，如果唔係就中招坐緊艇。隻股噚日收0.355元，較招股價每股38仙，低6.6%。
收市後小初打電話畀經紀陳，想讚佢英明神武，點知佢轉view，話覺得隻股可以留意多幾日，話唔定有機會反彈。佢又話，睇番隻股嘅股份分配，其實都分得好散，不過最大批係某位大哥坐咗，若果唔係，噚日成交就唔會只得1.3億股，明顯重有人坐緊。
佢又話睇盤路，都發覺有人接貨，而且係坐貨最多嗰位大哥嘅御用經紀，似乎係收集嘅迹象，所以佢覺得可以多留意一陣，睇吓嗰位大哥幾時會出手。
另外，早排靚女經紀提過嘅光通數網（155），打橫行咗一排後，終於發力炒上，噚日升16.7%，收2.8仙。唔知係咪仙股嘅關係，特別多炒家落場，須防下周一有回吐。