被嘲單春唔介意
Eason扮樹熊擒康仔證明冇事

蘋果日報 2002/05/23 00:00


蘇永康前晚舉行首場演唱會,任嘉賓的陳奕迅下體傷愈後,竟在演出時跳上康仔身上,以雙腿夾實康仔。而陳慧珊亦穿低胸裙大跳辣舞挑逗康仔。
蘇永康在紅館舉行的一連兩場「康定情歌演唱會」前晚揭開序幕,更請來陳慧珊、許志安、梁漢文和陳奕迅任嘉賓。開場時,播出張衞健聲帶取笑陳奕迅(Eason)是「單春」,其實早前在台灣弄傷下體的Eason已康復,他前晚與康仔在台上演出時,像以往一樣跳跳紥。
唱到興高采烈之際,Eason忽然跳上康仔身上,有如樹熊般以雙腿夾住康仔,明顯其下體傷患已康復。其後問康仔取笑Eason「單春」,不怕對方生氣?康仔說:「陳奕迅邊有咁易嬲呀。」

舞蹈極挑逗
至於被Eason突如其來跳上身,康仔說:「我都驚接唔住佢呀,佢上台係咁,唔係好多人好似佢,重創過都唔怕。佢好專業,人哋試過走音都怕會再走音,但係佢就從來唔怕。」
而陳慧珊(Flora)前晚穿着低胸裙與康仔跳舞,動作意識大膽,尤其Flora的動作極具挑逗意味,康仔說:「同佢做對手好好,唔使就住,換轉第二個,我可能唔夠膽摸佢。」

自爆性經驗
此外,梁漢文出場為康仔以鋼琴伴奏時,康仔大爆愛情經歷,他說:「我唔靚仔,所以唔敢同女仔傾偈,但係又估唔到會有同志向我招手,佢哋話我令佢垂涎欲滴喎,我先發現自己個樣好似個patpat一樣,令我回復自信。」
之後康仔又說:「我啲歌係愛情強力催化劑,即係春藥,我帶第一個女朋友番屋企,一路劈酒,一路聽《失眠》,然後激吻,最後重落埋訂㖭。」後來康仔否認所講是親身經歷,只是照稿讀。
採訪:胡比 
攝影:黃文成