英國桌球錦標賽禮拜四晚出現一場被喻為今季最精彩嘅賽事，綽號「火箭」嘅英國球手奧蘇利雲（Ronnie O'Sullivan）喺第4圈，俾嚟自泰國嘅Akani Songsermsawad逼到有氣無碇唞，將Ronnie逼到出局嘅邊緣。不過，薑始終係老嘅辣，奧蘇利雲因為對手喺第十局未能set士碌架而追成5:5平手後，喺決勝局再把握機會贏76:29，總局數以6:5險勝晉級。

英國嘅傳媒都叫呢位泰國球手做Sunny Akani，佢只係得22歲，2015年先至轉打職業賽。Sunny仔喺今屆英錦賽唔止一次講過自己嘅偶像就係奧蘇利雲，不過呢場波對住Ronnie，佢就一啲都無怯場，一開波就連贏兩局領先2:0。奧蘇利雲之後雖然追平2:2，但之後四局嘅發展同四局發展一樣，Sunny仔連贏兩局，但係「火箭」又再追平。

第9局，Sunny仔打出一cue 128度，破咗自己職業生涯嘅一cue最高度數（125度），領先5:4，爭一局就可以打爆「火箭」。第10局，奧蘇利雲領先66:48嘅時候，檯面只係淨返粉紅波同黑柴，Sunny仔一定要set士碌架至有機會。奧蘇利雲埋檯拆招幾乎「撻死」，跟手Sunny仔再set士碌架，點知「付碌」打入咗粉紅波，Ronnie追成5:5平手。

最後一局，兩位球手爭持一段時間，最後奧蘇利雲贏76:29，喺險過剃頭嘅情況下贏波晉級半準決賽。完場之後，全場觀眾起身向合演呢場精彩比賽嘅奧蘇利雲同埋Sunny仔拍手致敬，呢位泰國球手亦都雙手合什向球迷回禮，Ronnie更加同Sunny仔傾咗幾句先離場。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM