伊巴謙莫域離開曼聯已成事實，不過佢都不愁冇班落，唔少球會都喺社交網站話想簽佢，不過當中連荷乙下游隊都有份，係真心想簽定抽下水博見報，球迷就要自行定斷嘞。

泰斯達喺上季荷乙總成績只係排17，佢哋球會官twitter日前出文，問曼聯可唔可以畀伊巴嘅聯絡方式畀佢哋，想搵下傾下加盟事宜。至於德甲嘅哈化柏林可能靠譜啲，佢哋都出tweet，講明話佢哋球會係冇乜錢，但伊巴話晒一直都未贏過德甲冠軍，唔知夠唔夠吸引力令佢加盟。