近年圈中多喜事，好似吳奇隆、鄭嘉穎、陳展鵬等都成為「準爸爸」，等緊迎接佢哋BB出世，噚晚忽然傳演《琅琊榜》梅長蘇嘅大陸演員胡歌秘密結婚，有一名自稱婚慶公司職員嘅人爆料，指胡歌搵佢哋公司辦喜事，亦已領結婚證，但「神秘新娘子」被大陸網民瘋傳後竟然出現三個版本：有傳新娘係胡歌同公司嘅23歲小師妹章樂韻、又有傳胡歌同前女友薛佳凝復合，更有傳胡歌新娘係早前被影到喺飯店密會過嘅嗰位圈外有錢女。

現年36歲嘅胡歌感情生活一向好低調，單身多年，近年每次出席友人婚宴，亦成為被催婚嘅對象，估唔到未公開戀情，就被爆結婚，對於網民爆料胡歌同女星章樂韻領證結婚呢件事，一位胡歌公司工作人員回應大陸媒體：「假的，假的離譜！」而胡歌所屬唐人影視亦火速回應，喺凌晨1點幾更新微博：「胡歌結婚，絕無此事！」

事實上，胡歌同前女友薛佳凝嘅事一直成為焦點，胡歌喺兩年前上節目《魯豫有約》曾被問到舊愛，當時胡歌陷入一陣沉思，過咗一陣，胡歌先話：「她是…唉…她真的是很好。」同時低下頭，用手抹一抹眼眶泛起嘅淚水，當時主持人感嘆二人係「真的是真愛」。

精選娛聞，喺晒《娛果》
http://fb.com/appledailyent