奇連士文今季強勢回歸德甲，但由佢領軍嘅拜仁慕尼黑連燒兩炮唔響，咗德國超級盃之後，前晚喺碧根鮑華盃主場輸畀國際米蘭。咁都未算樣衰，國米入波功臣文仙尼賽後居然整爛隻最佳球員獎盃，都唔知攞景定贈興。
拜仁舊年喺碧根鮑華盃以0:1不敵到訪嘅西班牙球隊巴塞隆拿，今年對住由摩連奴領軍但陣容唔算完整嘅國米，諗住可以贏番次。奇哥排個陣都算幾強，拿姆、盧斯奧、雲邦美、高路斯同普多斯基都係度，只係冇咗列貝利、舒韋恩史廸加同東尼。成場波佢哋嘅攻勢係就係多，但係點都射唔穿托度嘅十指關，仲喺52分鐘俾國米中場文仙尼一腳搞掂，結果輸0:1，又一次同呢個盃無緣。

文仙尼攞獎變拆盃

本來勝敗乃兵家常事，不過文仙尼喺賽後接過全場最佳球員獎盃之後，竟然整鬼爛咗，搞到個盃一分為二，令到場面不知幾咁尷尬。話晒喺人哋地頭攞盃，我求大俠唔理文仙尼佢有心定無意，總之整爛個盃就係佢唔啱。話時話，文仙尼佢咁笨手笨腳，他日國米如果贏到歐聯，睇嚟摩連奴同班員都唔會俾佢掂隻盃。
講開捧盃，拜仁上月23號喺德國超級盃以1:2輸咗俾多蒙特，家陣又喺碧根鮑華盃飲恨，唔通奇哥轉做教練後冇捧盃命？08/09球季德甲聯喺本月15日開波，俾絕大部份德甲聯球隊都睇好拜仁可封王。講真以佢哋人腳，聯賽錦標應該飛唔出佢哋五指山。之但係，上季佢哋贏波唔益人，被波友冠以「衰波之霸」嘅稱號，我求大俠希望喺奇哥帶領之下，今季可以帶挈波友，唔再做毒草啦！