《蘋果》前日獨家踢爆世紀賤男黎振燁背妻偷食大台「姣精」朱智賢，事件曝光後，朱智賢受盡千夫所指，皆因她不單止背男友謝東閔偷嗒人夫，甚至對黎振燁太太和即將出世的BB造成嚴重傷害。《蘋果》收到消息，黎振燁原定於今日與大肚老婆返電視城，為偷食事件拆彈，殊不知大肚老婆臨時改變主意不肯現身，反而「姣精」朱智賢得到男友支持，齊齊到電視城舉行記者會，不過全程未有向黎太道歉！

偷食事件發生後，有網民表示令人聯想起去年黃心穎和許志安的「安心偷食」，記者會舉行前夕，心穎前度男友馬國明在將軍澳出席活動，對於被舊事重提，馬明說：「大家應該向前看，呢件事都已經過咗去，我哋幾個當事人都放低咗，冇必要再重提，亦都唔好怪責任何人。」之不過有網民形容謝東閔是「馬明2.0」，馬明聽聞後說：「係咩？我冇留意呢個稱號喎，不過我開緊廠，都知發生乜嘢事，人哋嘅嘢我唔回應喇！感情嘅事自己先知。」再問會否安慰謝東閔，他說：「佢大個仔，靠自己喇！相信冇問題，男人大丈夫，感情事唔係最重要嘅事，有好多嘢要兼顧。」馬明亦表示不抗拒與圈中人拍拖，一切要看緣份，有機會同大家講。