當年今日

探土國軍情叻過記者
求驗客手記:米路發揮老薑本色

蘋果日報 2002/03/28 00:00


咪以為國足教練米路天奴域淨係掛住玩同拍廣告,當世界盃冇咗回事,查實佢已默默展開備戰工作,重不知幾咁落力㖭!
米路前晚走咗去德國睇土耳其對南韓場友賽,重喺半場休息接受電視台訪問時騷哥利,反問記者知唔知喺落場嘅土耳其球員當中,有幾多個喺禮拜日比賽過。記者答大約十個,但係米路就回答:「你講得唔啱,得七個,佢哋只係休息咗一日,發揮得算唔錯。」
見到米路開始嚟料,我求大俠都終於放下心頭大石。事關米路早排唔知係咪掛住玩同搵錢,搞到懵吓懵吓,連世界足球先生費高係乜嘢國家都唔知。不過,佢數得出土耳其有幾多個球員喺禮拜日比賽過,睇嚟佢老人家開始見真章嘞。
不過,係人都知米路喺世界盃嘅紀錄良好,由佢帶嘅球隊起碼可以從分組賽出線,唔好話我求大俠諗衰人,佢落力備戰,無非都係唔想整臭自己個朵啫。

艾芬保聽洛史超活點
拜仁嘅德國中場艾芬保日前爆響口,佢會聽搖滾樂巨星洛史超活嘅說話,下屆去英超聯搵食。我求大俠聽到呢單料,第一個反應就係覺得有冇搞錯。老實講,聽人哋嘅意見係好,但係話晒艾芬保佢假假哋都係世界級球星呀,隨隨便便咁決定自己嘅前途,似乎又真係有啲兒戲喎!

簡拿華路唔肯唱國歌
意大利後衞簡拿華路話到明,佢唔會因為傳媒向佢施壓而特登喺賽前唱國歌。或者有人覺得簡拿華路咁做係唔尊重國家,但係我求大俠認為,只要奏國歌時肅立,已經夠尊重嘞,但係就千祈唔好學美國短跑好手格連咁
碧咸學人Rap世盃金曲
英國有音樂人想碧咸翻Rap英格蘭打九○年世界盃嘅主題曲《WorldInMotion》,作為英格蘭喺今屆世界盃嘅主題曲,但係我求大俠就覺得佢哋擺明耍碧咸。係人都知碧咸得把雞仔聲,唱功唔使講,又點Rap歌呀?我求大俠奉勸碧咸慳啲好過,畀啲心機為英格蘭打好世界盃好過啦!

曼聯追拉素數尾冇面畀
曼聯季初以一千六百萬鎊將史譚賣畀拉素,但到呢一刻為止,先至收到四百萬鎊,於是佢哋就搵國際足協幫手追番條尾數。查實拉素都唔想拖數,但係鬼叫佢哋今屆成績咁差,收入亦因而直接受到影響,邊度搵千幾萬鎊畀曼聯。話時話,日前先至話勁賺嘅曼聯家陣又唔係等住嗰嚿錢開飯,使唔使迫得人咁緊呀!

魔術手要做愛滋市長
真係服咗「魔術手」莊遜,人哋生愛滋就喺度等死,佢就愈活愈精采,唔單只喺商界八面威風,𠵱家重話有意角逐○五年嘅洛杉磯市長㖭,話唔埋洛市真係出現第一個「愛滋市長」㗎,所以我求大俠幾時都話,錢呢樣嘢唔係萬能,但冇佢就萬萬不能,如果唔係,我估「魔術手」都冇家吓咁精神囉!