李佳芯今日喺中環為香港佳士得春季拍賣記者會上，示範5套珠寶及翡翠首飾、名錶及手袋，總價超過4億元，其中一條8.01克彩藍色鑽石吊墜項鍊價值逾1.45億元。

事後李佳芯表示未試過戴咁貴，笑指嗰條1.45億元嘅項鍊價值仲貴過佢。問佢值幾多錢？李佳芯話：「每個人嘅價值都唔同，如果拍賣我，我會值幾多，係咪會冇人舉手呢？」有男友陳炳銓嘛，佢笑住話：「一個？即係1蚊都搞得掂㗎喎，因為拍賣只要有人出價就得，咁可能我只係值1蚊。」

問佢有冇睇中咩名貴首飾？李佳芯表示好少戴全set，因為怕俗氣，不過佢指媽咪有教佢買玉器、翡翠、金，但佢認為後生女梗係鍾意鑽石。問到男友陳炳銓有冇送過鑽石？佢話：「首飾就有，鑽石就未試過，可能一係唔送，一送就係求婚嗰隻。」期待？佢笑笑口咁話：「唔知呀，不過珠寶首飾自己買都可以，唔一定人哋送，自己買會有成功同滿足感，我都儲想買樓。」

幾時做業主？佢表示：「承你貴言，希望快啦！通常第一次買嘢，要留意好耐，所以要做功課，希望一擊即中，搵個單位好、升值能力好、風水好，揀樓好似揀老公咁，不過我o依家樓同老公都未有。」陳炳銓係咪好似樓花？佢未有正面答，只笑指：「對我嚟講，樓花值得買過現樓，總之我會買有升值潛力嘅嘢，做人同買樓一樣，我係穩陣嘅人，希望工作同感情都係穩步上揚，有升值潛力。」

對於母親節快到，李佳芯表示會同媽咪慶祝：「媽咪生日同母親節好近，所以會食飯慶祝，禮物通常買一份。」陳炳銓媽咪呢？佢話：「我見過，節日都有食飯，不過母親節就冇諗到。」

精選娛聞，喺晒《娛果》
http://fb.com/appledailyent