港股低開後悶足大半場，全日高低波幅不足200點，創一個月新低，成交縮減至702億銀，好聽啲就係觀望，實情係塘水滾塘魚。明日習近平展開訪美之旅，想搵概念股炒，不妨留意佢嘅一舉一動。

今日升幅榜排首位嘅係老牌工業股日東科技（365），單日爆升25%，最新市值4億唔夠，每股NAV0.65元，與現價相若，大股東與相關人士持股逾五成，配合平平無奇業績（最新年度僅賺254萬），說穿了又係殼股一隻。另一邊廂，52周新高榜見到另一隻工業股愛高（328）。咁面善嘅？無錯，係股壇長毛DavidWebb愛股之一，最新持股量9.03%，息率5.2厘，現金含量達六成，完全吻合Webb嘅要求。

入正題，推介冷門股利民實業（229）。「吓？今日零成交喎！」無錯，話明冷門股，成交一定低，從好嘅角度出發，一旦有資金追捧，可以炒到飛天。利民有乜咁巴閉？市值4.8億，每股NAV1.27元，現價1.01元計，市賬率僅0.8倍，中期盈利僅927萬，大股東與相關人士持貨逾三成，同樣符合殼股條件。Webb年中申報持有利民5.03%股權，其後股價一度炒高四成，如今打回原形，以其8厘股息及近五成含金量嘅優厚條件，如果同時打入升幅及52周新高榜，都唔值得驚訝。

【只要用心，人人都可以係股神！】
https://www.facebook.com/tongcow88

掌握財經生活資訊，即Like「蘋果ATM」fb專頁啦！
http://fb.com/appledailyatm