紐卡素今季由英冠回升英超，不過一向孤寒成性嘅肥佬班主艾殊利，唔係好肯使錢擴軍，搞到領隊賓尼迪斯冇乜心機，成日都走人，球隊未計周日作客史雲斯之戰，開季頭3戰亦只得1勝2負，戰績麻麻。

雖然紐卡素爭英超冠軍冇乜機會，不過艾殊利都有野心捧吓其他盃仔，佢就豪言如果紐卡素今季贏到英足盃冠軍，球隊就可以瓜分2千萬鎊（約2億港元）獎金，希望重賞之下拎到冠軍。不過英足盃近期成為「雲格盃」，事關阿仙奴近4屆贏左3次，艾殊利問過雲格未？