保良局慈善哥爾夫球賽今天喺粉嶺舉行，作為保良局主席嘅梁安琪當然有現身負責頒獎，而體育協會暨奧林匹克委員會會長霍震霆就為比賽擔任主禮嘉賓，並為比賽主持開球禮。

不過霍震霆似乎疏於練習，事前要問工作人員點樣擊球，誰知開球時連環3次擊球失敗，揮第4杆先成功將球擊出。問到霍震霆係咪經常打哥爾夫球？佢就尷尬話：「睇到我都麻麻哋，獻醜。前幾日慶祝中山溫泉賓館30周年，內地第一個哥爾夫球場係我哋起，30年前啦，係生手啲，經過今日要提高警惕，o依家打網球健身。」

問到可有跟孫仔霍中曦一齊運動？希望孫仔成為水上最強定係地上最強？霍震霆就好似有啲想投訴話：「唔好咁諗，依家先歲幾，依家嘅父母好怪，咁細個就上嗰啲班。（是否Playgroup？）咁細個就開始，原來香港競爭咁大。」咁會唔會跟孫仔多做啲運動？佢話：「慢慢嚟，等佢自己選擇，打哥爾夫球幾好，環境幾好。」孫仔識唔識叫爺爺？霍震霆表示：「只叫爹哋媽咪，仲差爺爺，等緊，日日同佢講爺爺，但係未有反應。」