鷹君（041）爭產案鬧上法庭，鷹君主席、三子羅嘉瑞一於懶理，繼續你有你講，我有我增持，上周五再入市買入4.6萬股，盛惠182萬大銀。銀碼濕濕碎，但羅老太激到紮紮跳，透過發言人話，「羅嘉瑞就係要買到多過阿媽，感到非常之唔高興」。
查實呢單爭產案已經由閂埋房門到鬧上公堂，雙方你來我往，隔空多次大打口水戰，屬羅老太一方嘅六子羅啟瑞甚至贊助埋徵文比賽，題目單字一個「孝」，心底想講乜真係不言而喻，嚟到三八婦女節都繼續有花生，遲啲上庭見真章分分鐘係一場腥風血雨。

三子一方持股量逼近羅老太

羅老太發言人又指，羅嘉瑞等人合共加埋嘅個人持股量，已經非常接近羅老太嘅33.8%。鷹君發言人就反擊，指羅嘉瑞過去30幾年來，一直有喺市場增持，而作為主席，增持主要係佢對公司未來發展有信心。根據聯交所股權披露，連同家族信託持股，羅嘉瑞持有鷹君超過60%。
另外，又有口痕友同華華講，話如果有其他家族成員對公司有信心，亦可以用自己資金喺公開市場吸納鷹君股票，相信唔會有人阻撓。雙方唇槍舌劍，呢場家族恩怨都唔知點收科，揸開筆嘅華華都係參加徵文比賽好過。

李華華
mailto:[email protected]