女子組合FFx今個月初由4變3，李詩詠（Ceci）、潘穎琳（Mizaki）及周葆諭（Christy）力數成員楊澤怡Shirley三宗罪後，隨即飛甩佢，以3人組合繼續FFx，即使Shirley事後聲淚俱下話唔知點解俾隊友屈，又話一直係前經理人Sam性奴，但3位隊友都心軟，仲啱啱以3個人FFx接咗新廣告添！

因為一首《SUGARBABY》平價MV彈出嘅FFx，五月尾喺麥花臣場館搞個演唱會，演唱會前兩個星期仲話三千幾張門票已經賣晒，點知正式開騷入座率只有一成變成靈異騷。不過，正所謂喺邊度跌底就喺邊度起番身，FFx下個月又踏舞台喇，仲由九龍唱到過海，喺灣仔會展有場個半鐘頭嘅演唱會，場地可以容納400人，即係話今次FFx開騷，真係好大機會全場爆滿喇！

呢個喺8月21日舉行嘅演唱會，其實係佢哋啱啱接咗嘅一個韓國電池客戶幫佢哋搞嘅，Ceci、Mizaki同Christy仲已經幫演唱會影咗宣傳相，而呢輯相嘅風格同以前最大唔同嘅係...佢哋3個都著長衫袖，仲要包到上項項頸嗰隻，雖然都係着短裙仔，但同之前成日又金又銀兼露事業線，咁樣着咪青春好多囉！