【乘客小心！】乘客提高警覺 批評九巴遲通報
蘋果日報 2018/06/29 15:30
乘客小心九巴座位有針針拮染病惡作劇意圖傷人
龐女士坐下前，先摸清楚座位有否刺針。（文兆麟攝）
三部九巴先後被發現上層座位遭人插上大頭針或鐵針，分別涉及41A、48X及81號巴士，當中有兩名女乘客被刺傷臀部及腿部。今日有搭該三條巴士路線的乘客，上車坐位前都顯得小心翼翼，左望右望，其中龐女士就用手掃下整張座位，確定無異物才坐下，龐女士表示，昨日收到朋友的Whatsapp知道事件，感到好擔心，所以上車望清楚才敢坐下。
而崔太亦直言好擔心，她估計犯案的人心理「唔正常」，「上車睇下個座位先坐，比以前留意多咗，擔心支針有菌。」她坦言巴士公司亦好難做，但司機檢查過會安心啲，「早兩日朋友Whatsapp過嚟，心諗咁嘅人都有，巴士上竟然有人拮針。」她又指早兩日已收到Whatsapp獲悉事件，反而巴士公司昨日才公佈，「通報真係慢咗啲！」
而註冊中醫沈先生自言「唔夠眼」，「唔敢摸，拮親染愛滋我咪死得。」他每日都搭81號路線九巴，他批評兇徒「極度無恥，損人不利己，心理變態」，他指九巴公司有cctv，但要張張凳檢查都好難，唯有自己小心啲睇清楚，亦希望警方可盡早拘捕真兇。
崔太指九巴公司遲公佈消息。（文兆麟攝）
中醫沈先生斥責兇徒損人不利己。（文兆麟攝）
巴士上安裝了cctv。（文兆麟攝）
48X及81號巴士被兇徒擺放刺針於座位上。（文兆麟攝）