大台最近人才流失，好多節目都由一班後輩嚟主持，欠缺號召力，連曾志偉都寧願北上主持內地真人騷，賺下人仔。噚晚志偉有份做評判嘅《來吧！灰姑娘》首播，節目講一班唔起眼嘅內地姑娘點樣成功做到好演員，之前志偉亦批評過劉嘉玲出道時，好老土係「灰姑娘」，仲爆嘉玲當年落嚟香港連高踭鞋都唔識著，又話過好似張曼玉、李嘉欣、鍾楚紅，佢哋都係由零開始，嚟鼓勵一班內地姑娘(新聞連結： http://bit.ly/1CrlzLH )。

節目噚日正式播出街，由志偉、黃曉明、黃建新三個做星級評判，七位姑娘當中，以嚟自龍江省五大連池市嘅「小龍女」替身付柔美琦最為注目，佢就喺現時內地播緊于正版《神鵰俠侶》做小龍女陳妍希替身嘅人，負責喺橫店做「人肉怖景板」，算係有啲演出經驗，難免勾起黃曉明同志偉嘅拍戲回憶。志偉話：「替身演員多是做武打替身，現在拍戲錢多了，就有替身替明星打光，大明星拍完戲就不用站在那了，找一個身材差不多的人，穿同樣的衣服站在那做替身。」

曾志偉仲講起以前做「茄哩啡」嘅日子，指佢啱啱出道嗰陣，都做過替身，因為生得矮，所以做嘅都係女人替身，仲成日因為唔小心露出個樣，而被導演鬧「你以為你是誰啊」。

曉明就分享咗好多拍戲嗰陣，遇到嘅痛苦經歷，佢話拍《鹿鼎記》，佢試過天寒地凍同七個女演員跳落水浸足幾個鐘；拍《神雕俠侶》嗰陣，喺九寨溝每隔兩日就要落一次水，仲親眼見過劉亦菲有次因為水太急，差啲被沖落懸崖，要由幾個壯漢跳落水去救劉亦菲，差啲就冇命。志偉都話好怕拍落水戲，尤其係演淹水叫救命嘅戲，指如果真係抽筋，大家只會以為你演得逼真，冇人會救你。

見到嚟自雲南嘅女武術冠軍陳可丹話要做武打明星，志偉就即以成龍為例，同參賽者講做功夫演員比一般演員要付出十倍、廿倍。指成龍幾乎拍每一部戲都受傷被抬去醫院，每次「度橋」，成龍都會問「從這裏摔下來有沒有問題」、「從這裏跳過去要不要吊威亞」，志偉就問：「你是不是被虐狂？」由於評判最後要揀一個「灰姑娘」，志偉就揀咗陳可丹，話自己之前都跟過劉家良、洪金寶學習武打，希望能夠幫助到陳可丹，希望搵到位打得比楊紫瓊仲好嘅女演員，有冇咁誇呀?