近排本地見習騎師成為公眾馬迷嘅焦點，蔣嘉琦接連攞兩個海外大獎，巫顯東同潘明輝亦有頭馬見面。

一直以嚟，本地見習生好多時都擺脫唔到畢業等如失業嘅命運，好似因為夠年齡強制畢業嘅吳嘉晉，今季成績持續低沉，暫時只係贏得一場頭馬，如果季尾都未見起色，下季都未知可唔可以繼續騎師生涯。

記得嘉晉仔返港出賽初期，成績一啲都唔差，首日出賽已經有頭馬兼起孖；可惜其後發展際遇麻麻，又不時受到傷患影響。喺馬圈浮浮沉沉多年，今季嘉晉仔雖然仲有五磅減，但頭馬同入位率持續偏低，座騎數目亦唔多，若下季未獲發自由身騎師牌照，可能到時只有轉向幕後發展，轉任騎馬人。

今晚(5日)泥地夜賽嘉晉仔有四隻座騎，其實師傅告東尼對佢都可謂不離不棄，今晚彈畀佢跑嘅第七場「馬克羅斯」同第八場「勁精神」，都係有實力嘅機會馬。「馬克羅斯」已經連續兩場後追悅目，撞啱蔡明紹停賽，告仔最近晨課安排嘉晉仔彈課泥閘同操練，好明顯有心關照。

至於「勁精神」上次嘉晉仔快放跑第二，喺超快步速下輸少少畀「傾心星」，今場唞夠回爭兩戰全上名嘅最佳路程，隨時可以幫隻馬打開勝門。

師傅告仔擺到明以行動支持，但最緊要都係嘉晉仔自己爭氣，好好把握有實力馬騎嘅機會，騎番起信心的話，成績自然有望反彈。

阿Joe