意大利球壇出名多型佬，47歲嘅車路士領隊干地都係其中一分子，周五佢就返到家鄉意大利，同老婆Elisabetta、囡囡Vittoria齊齊去海灘同陽光玩遊戲，見佢如沐春風咁，似乎未受車仔增兵遇阻滯、同迪亞高哥斯達不和等傳聞影響心情；有狗仔隊捕捉到佢着住白色短褲上水一刻，更俾英國《太陽報》攞嚟同「占士邦」英國男星丹尼爾基格（Daniel Craig）比較！雖然干地冇咁爆肌，但單計「顏值」唔係輸好多咋。

不過，干地放假之餘都有好多工作要跟進，除咗繼續力追轉會目標，包括祖雲達斯守將邦路斯、修咸頓中堅華基爾雲迪積克同摩納哥中場泰莫爾巴卡約高等，據英國《都市報》報道，佢亦有意外借陣中幾位球員，包括葛特蘇馬、羅夫度斯卓克同李維士巴卡等。