韓國今日最多網民談論嘅話題就係現年46歲嘅人夫李秉憲落實演韓國金牌編劇金恩淑嘅新作《Mr. Sunshine》，由於金恩淑去年執筆寫神劇《太陽的後裔》，年頭又有《鬼怪》爆出，《太陽》同《鬼怪》都令「雙宋」宋仲基同宋慧喬、孔劉、李棟旭等演員人氣升至高峯，所以李秉憲事隔8年再出演電視劇，自然希望靠金恩淑喺視壇再食糊。

不過李秉憲於大前年曾捲入桃色醜聞，令到佢形象跌至谷底，唔少網民都話要罷睇佢作品，好在佢愛妻李敏貞力挺老公，最終李秉憲先算慢慢收復失地。

但係佢今次重回公仔箱，韓國網民依然唔多支持，唔少網民都留言話即使今次劇集有幾好睇，都唔會捧場，又有網民話唔明點解金恩淑會揀李秉憲做男主角，當然唔少網民重提舊事，留言話：「喺妻子懷孕時出軌嘅男人，真係唔適合」、「如果男主角係李秉憲，女主角就推薦金敏喜(金敏喜同已婚導演洪尚秀公開戀人關係)」。

而李秉憲於前日終於首度發微博，網民都估計佢此舉係方便為新劇做宣傳。