曾編寫人氣韓劇《最佳愛情》、《原來是美男》嘅編劇洪氏姊妹（洪貞恩、洪美蘭），執筆新作《和遊記》（前譯：花遊記）將於本月23號首播，由退伍男星李昇基扮演孫悟空、車勝元飾演牛魔王、韓劇《我的野蠻女友》女星吳漣序飾演唐三藏、FT Island嘅李洪基飾演豬八戒，係洪氏姊妹再度與車勝元、李洪基合作嘅作品。

劇組近日陸續公開眾主演嘅劇照，繼李昇基、車勝元後，今日就公開「豬八戒」李洪基嘅劇照，只見李洪基刻意為劇集染咗一頭金白髮，立即令粉絲諗起佢2009年拍攝劇集《原來是美男》飾演嘅「Jeremy」。

今次李洪基喺《和遊記》中飾演大明星，不過今日公開嘅劇照就見佢流晒鼻血，要用紙巾塞鼻止血，臉上似乎仲有個鞋印，一幅啱啱被人打完嘅樣，而佢又一臉委屈咁，認真可愛，就連劇組都表示「第一次見到咁嘅豬八戒」，相當爆笑。而李洪基亦喺自己Instagram上載當日拍攝嘅花絮相，更搞鬼留言話「好痛」，令粉絲相當期待。

另外，李洪基拍檔李昇基退伍後除咗拍劇外，更立即成為化妝品代言人，今日品牌方面就公開咗李昇基新相，大晒溫暖笑容。

更多韓流，喺晒《娛果》
http://fb.com/appledailyent