女神全智賢今年2月生完B後，一眾粉絲都靜待女神復出，而早前已盛傳全智賢會接拍《來自星星的你》編劇朴智恩嘅SBS新劇《藍色大海的傳說》(暫譯)，仲會孖另一長腿男神李敏鎬合作。

雖然雙方都未確定會否接拍，但呢個消息已經令一眾粉絲超級興奮，而今日製作公司繼續傳來好消息，表示全智賢同李敏鎬已確定出演朴智恩嘅新作，預計11月有得睇。據知劇本以安徒生嘅童話《美人魚》做題材，未知全智賢會唔會喺劇中變身成美人魚呢？

而有兩大男神女神合作拍劇，未開拍已吸引各地虎視眈眈，當中內地方面就已出高價50萬美元(約389萬港元)一集嚟買版權，預計16集嘅話，賣埠價就達6,224萬港元，創韓劇史上新高，比起兩大神劇《來自星星的你》及《太陽的後裔》更高。