鍾舒漫今年8月在私人fb發文自爆曾遭行內人騙財，但未有透露對方身份，據知她近年與曾為阮民安歌曲《煲底之約》MV擔任副導演的林灝軒（Steve）拍拖，他日前在fb轉貼陳潔玲疫市開店的相片，直指她借「黃藝人」之名食人血饅頭。有指陳潔玲早前引入日本的防疫噴霧來港，Steve與鍾舒漫等夾錢投資，但最後不歡而散。鍾舒漫追討約四萬元不果，已入稟小額錢債審裁處追討。

《蘋果》曾聯絡過Steve，他指當初是陳潔玲邀請做生意：「佢話想出寫真集，咁我從事影視工作，其間借咗兩本nude model（裸體模特兒）嘅書畀佢，但後來佢唱我性騷擾，仲騷擾我屋企人。」而他未有否認鍾舒漫是女朋友。是否陳潔玲未有退回金錢？鍾舒漫未否認：「但我覺得冇必要發大件事，佢（陳潔玲）同其他人有乜過節同我冇關。」不過，陳潔玲對指控感莫名其妙：「我冇話過佢性騷擾，我怕咗佢，唔係正常可以溝通到嘅人，所以我全數退返畀佢。」對於被指扮黃食人血饅頭，她說：「我發聲係屬於我個人，從來冇透過生意消費呢場運動。」至於跟鍾舒漫的金錢糾紛，陳潔玲直認：「佢已入稟告我呃佢錢，去到呢刻我都唔介意認。」她指Steve言論構成誹謗，已交律師處理。