當年今日
關於我們

【借阿妹過橋】中秋最想打機過 鄺文珣囝囝投訴:都唔畀我哋玩

蘋果日報 2018/09/24 00:00

滅蟲CadenceCasper彩虹潮式酥皮月餅食糖鄺文珣中秋節打機

中秋節,傳統係食月餅、玩燈籠。
時移世易,新一代小朋友多咗選擇,鄺文珣一對兒子、分別係10歲長子Cadence同8歲二子Casper,竟然衝口而出話中秋節要打機應節,聽日「追月」就係妹妹Chesney嘅1歲生日,兩位哥哥梗係想由迎月打機到追月喇。
鄺文珣日前帶咗兩個仔去黃婉曼喺鰂魚涌嘅麵包學校,跟導師Suky學整彩虹潮式酥皮月餅應節,兩子穿上圍裙,戴上廚師帽,帥氣十足,三母子跟住步驟開工,花咗一個多小時,就製作咗佢哋嘅愛心月餅。導師Suky為佢哋準備好油皮同水皮材料,先教佢哋用油皮麵糰上色,Cadence同細佬Casper都好用心學習,搓得頭頭是道,上色油皮混合水皮,再包入紫薯蓉同蛋黃,於是彩虹潮式酥皮月餅都基本完成,待放入焗爐焗約25分鐘,攤涼後就可以將月餅分開品嚐。Cadence同Casper見到出爐製品都異常興奮,畢竟自己親力親為製作,佢哋食起嚟寧舍滋味,兩兄弟仲雀躍話要拎番屋企畀爹哋試味。
鄺文珣同兩個仔都好enjoy整個製作過程,佢話:「我未同佢哋一齊整過月餅,佢哋鍾意整嘢食,可能成日睇煮食節目,成日叫我帶佢哋去學整嘢,見差唔多中秋節,不如一齊整吓月餅,佢哋鍾意搓麵粉。」Cadence同媽咪鍾意搓麵糰,Casper就話鍾意將麵糰切開。
三母子平時都有親子下廚,鄺文珣話試過整蛋糕,但Casper話仲有曲奇,不過媽咪就話兩兄弟喺屋企其實各自有貢獻,「佢哋會幫手做家務,Cadence有時會幫手洗碗,佢主動出聲,我更加會畀機會佢,我會畀佢哋做易handle嘅嘢,好似洗碗同吸塵,Casper就係滅蟲組組長。」Casper接口話:「我會殺死嗰啲嘢。」鄺文珣讚Casper夠大膽:「佢會殺死啲曱甴,我見到會第一個叫細佬,佢真係滅蟲組組長,佢拎住都唔驚,仲會叫『媽咪,等一等,使乜咁驚,等我嚟』,跟住佢去拎紙巾包咗佢,沖走佢落廁所,佢又會出動拖鞋,反而哥哥會有少少驚。」Casper就係鄺文珣家中嘅「三號情人」保護佢。
鄺文珣要照顧孻女Chesney都好忙,好彩兩位哥哥好肯幫手,「哥哥Cadence幫我睇住妹妹,又試過幫手換片同餵妹妹食粥仔,哥哥餵得好乾淨,Casper會有時餵妹妹飲水,妹妹鍾意哥哥同佢玩,所以Cadence係歡樂部長,Casper算飲食部組長同滅蟲組兩個部門。」
今年中秋多咗妹妹,佢哋會點樣過?兩兄弟答案非常反傳統,Cadence衝口而出:「食糖,媽咪畀我哋食好多糖。」認真嚇親媽咪鄺文珣:「有咁嘅事?In your dream呀,冇乜可能。」細佬Casper則話:「食麥當勞。」鄺文珣立即糾正:「佢哋講晒反話,我最唔畀佢哋食,出鏡講咗出嚟,你哋真係唔使諗。」Casper招供:「今年食好多。」鄺文珣有理由估計囝囝偷吃,因為平日佢絕對唔畀佢哋食太多甜食。
兩位哥哥會唔會同妹妹一齊玩燈籠?Cadence又詐詐諦測試媽咪底線:「同佢玩燈籠啦,同埋唔知媽咪會唔會畀我打機?」點解中秋節要打機?Cadence理直氣壯話:「因為妹妹鍾意睇我哋打機,我想等妹妹大個一齊打機,想教妹妹。」細佬Casper和應哥哥:「呢個係traditional。」鄺文珣篤爆兩子:「搵緊藉口畀自己。」
兄弟異口同聲話「玩少少囉」,鄺文珣問佢哋:「係咪因為平時冇得玩?所以想中秋節打機?」Cadence爆料:「係呀,放假要relax下。你都唔畀我哋玩,只可玩only 15 minutes,唔係玩好多,打完機,又要讀啲書,不過休息吓對眼,之後又可以打。」鄺文珣真係聽到啼笑皆非:「好似我係鞭打佢哋嗰啲虎媽。」佢問邊個叫兩子看書後再打機,Cadence同Casper竟推出爸爸做「擋箭牌」:「因為爹哋都鍾意打機,佢要學from我哋,全屋只有媽咪同妹妹唔識打機。」兩子真係童言無忌,嚇到媽咪鄺文珣O晒嘴。
採訪:楊定
攝影:陳慧安 
攝錄:沈健程
場地:Rise
髮型、化妝:Bell of Bell.T Makeup
精選娛聞,喺晒《娛果》
http://fb.com/appledailyent
empty
鄺文珣日前親子整月餅。(攝影:陳慧安)
empty
鄺文珣兩子話中秋想食糖同打機,嚇親媽咪。
empty
導師Suky細心指導。
empty
哥哥Cadence好奇聞吓酥皮,猛話好香。
empty
鄺文珣喜歡搓麵糰,佢覺得好有趣。
empty
Cadence同細佬Casper期待月餅出爐。
empty
三母子享受親手製嘅彩虹潮式酥皮月餅,齊齊話好味。
empty
鄺文珣話兔仔燈籠係童年回憶。