賭王四太梁安琪（圖）舊年成立尚嘉控股，管理私人過百億元嘅物業投資，其中最貴重嘅物業，肯定係中環娛樂行，佢2005年以27億元買入全幢物業，原來當年只因為鍾意娛樂行呢個名而扑槌，完美演繹「有錢就是任性」。
四太最近接受《福布斯》訪問，大談生意經，但唔係講賭場，而係講物業投資。佢話自己好少出貨，回想11年前買娛樂行，佢話「本來傾緊買另一個物業，但聽到娛樂行放售，即刻由澳門飛嚟，我好鍾意個名」。佢呢個講法，即刻令人想到「有錢就是任性」呢個潮語。不過更多人任性過佢，四太透露，一直有好多投資者或經紀搵佢，話娛樂行至少值63億元，問佢賣唔賣，但佢就冇意放售。事實上，尚嘉控股office𠵱家都係設喺娛樂行。