《宮心計2之深宮計》播到第三個星期，落筆之時韓馬利飾演嘅鄭淑妃已經入返宮，周秀娜仲未出場，劇情繼續乏力。有觀眾話期待娜姐出場之後同胡定欣爭馬浚偉可以有返啲宮鬥嘢睇，咁就真係未知之數。但以依家播咗嘅集數嚟講，我覺得好似將小青姐嘅皇牌劇《法證先鋒》仲有《公主駕到》溝埋一碟。未必係因為創作團隊冇新嘢，而有可能係同套劇係合拍片有關。

合拍片，除咗無綫，仲有另一方投資，姑勿論另一邊係咩地區嘅資金，身為投資者，最好就係有數據喺手，咁拎舊錢出嚟先至心安。一套電視劇點先會有「參考數據」，就係開續集。所以你見合拍片通常都係續集，而且係高收視劇集嘅續編。《使徒行者》、《溏心風暴》、《宮心計》、《創世紀》、《衝上雲霄》，通通都係無綫皇牌劇，呢啲劇本身就係一個個品牌（即係大陸叫嘅IP）。要投資者有信心，搬呢啲出嚟就容易傾得成事，而當中更加有啲係投資者自己建議開拍續集，例子有《衝上雲霄2020》，自己搵上門就唔好嘥。不過咁搞法，劇情創作方面就處處受阻。因為要有參考，就難免會重複之前嘅皇牌橋段，想有突破相當困難（加上續集從來都唔易寫）。最致命嘅係呢啲高收視、影響力跨地域嘅劇集，大多數已經係n年前嘅作品。當你要「強化」當年嘅食糊招數同橋段，而又唔理時空已經相隔至少10年時，就變咗好用力咁做老套嘢，即係好似《溏心3》咁圍埋坐唱吓歌同埋講金句，用錯力死得快。

《宮心計》同《深宮計》好在係古裝劇，冇咗時間嘅痕跡，自然冇咁礙眼。不過套劇仍然逃唔出監製自己所建立嘅品牌：《法證先鋒》嘅驗屍查案、《公主嫁到》嘅嬉皮笑臉，放返晒落去《深宮計》當中，好好哋一套「深宮攻心劇」變咗做大雜燴。《飛虎之潛行極戰》一樣有咁嘅情況，都分唔清係睇緊《飛虎》定係《使徒行者》。當然，合拍片嘅監製一日仲係拍合拍片，永遠都唔知道究竟佢係被迫複製，定係黔驢技窮。我只係希望合拍片唔好十次有八次都要拍爛個劇嘅品牌先肯收手，畀返啲美好嘅回憶觀眾好唔好？

我嘗試最正面咁諗，如果真係投資者嘅影響，希望無綫可以企得硬淨啲。人哋同你合作係因為你一直建立嘅專業形象，你就應該可以用呢份專業，去話畀投資者知咩嘢係好，咩係唔好。如果唔扭轉呢個局面，「合拍片」呢三個字，只會愈來愈得趕客。唔只係對觀眾，對無綫自己嚟講都係件慘事，因為合拍片唔只係自己嘅事，要同合作方交代，試咗幾次都冇收視，就自然冇下次。

 

專欄作者簡介：
方以文
電視迷，未成精。睇好電視。

Facebook專頁：
https://www.facebook.com/fongeman

發掘更多身邊的小城故事，請LIKE 蘋地 Facebook Page，並設定為「搶先看」： https://fb.com/appledailyland