【睇通睇透】操到火噴噴 成隻馬識飛咁滯(魯賓遜)
葉楚航魯賓遜睇通睇透勁飛寶寶
葉楚航馬房今季已贏24場,頭馬主要來自新馬,如近期贏馬的「電訊超人」,以及插班後三連勝的「精益求精」。
今午(11日)第一場五班1400米「勁飛寶寶」,近期晨課操到火紅火綠,擺明降班即刻郁手搏殺。
「勁飛寶寶」今季首戰跑田草1200米,只輸一馬位跑第二名,而該仗頭馬「智愛」其後亦在四班再贏,賽事水準不俗。
不過「藝高強」子嗣普遍遲熟,而且性能宜跑中長途,此駒跑短途能夠上名,純粹憑質素搭夠。
上場跑田草1400米,前中段落後甚遠,幾乎包尾入直路,但亦能後上跑第五,其實走勢相當好,狀態已及爭勝水準。今仗降班佔盡班利,面對一批質素平庸的五班馬,贏面高唱入雲。
「開心美麗」上場縮程跑1400米,改用留前鬥後跑法,竟可從外欄衝贏所有對手,表現
脫胎換骨,目前進度如日方中,仍然跑五班賽有利,爭勝要角。
「教主」季初曾在四班跑1650米上名,跑中距離的能力已有證明,雖然近績一般,但降班有利,未可輕視。「路路發」實力見盡,但狀態仍勇,屬配腳之材。