有志者事竟成，呢句說話確實無錯 — 因為《Pokémon》永遠都是 10 歳的主角小智，與比卡超闖蕩江湖超過 20 年，終於在聯盟大賽當中奪冠，成為小精靈大師！

昨日在日本播放的《Pokémon 太陽 & 月亮》第 139 集當中，劇情提到小智在「阿羅拉」聯盟大賽當中，與對手格拉吉歐在決賽回合對戰。由於小智的比卡超，與格拉吉歐的索羅亞克（ゾロアーク）打成平手，於是兩人各自派出自己的小精靈鬃岩狼人（ルガルガン）對戰。

部分觀眾固然對於有「二奶命」的小智不看好，甚至認為小智唔贏比賽，又點可以繼續周遊各地呢？不過，創作團隊今次終於讓小智勝出，令人喜出望外，就連 Pokémon 的官方情報 Twitter 也特意製圖也發出「賀電」。或者呢件事實在太爆，所以有外國網民都話，到底 LeBron James 喺 NBA 決賽週落後 1:3，最終都帶領到克里夫蘭騎士拎到冠軍犀利啲，定係小智拎冠軍犀利啲？

《Pokémon》自 1997 年 4 月播放，小智在首次參與的「關都聯盟」大賽當中，僅 16 強就止步。雖然他屢敗屢戰，但在 2016 年 8 月的片集當中，小智在「卡洛斯聯盟」決賽也只是得到第二名。難怪有網民曾經認為，「小智贏冠軍」只係一個永遠都不會達成的夢想，但這種講法今時今日也終於打破了。

係呀，對手真係好強大。但一直嘗試，大家最終都係會贏，係咪？