路政署宣布西貢公路改善工程（第二期）方案，原本雙線雙程嘅路段，將擴闊為四線雙程，期望改善日益惡化嘅塞車問題。 

當初塞車問題點解會惡化？西貢假日一向遊人眾多，許多訪客本身經已揸車出入，繁忙時段已經好塞。但近年起，西貢有至少 1,400 個住宅單位落成（見下圖）。未來西沙路十四鄉嘅新地項目，仲會起成 9,500 個單位。塞車惡化，首先為連串錯誤發展所引起。

西貢本身係被郊野圍繞嘅墟市，只有南北兩條、穿越鄉郊嘅公路。作為來往香港東面後花園嘅重要交匯點，西貢公路不少運載容量，相信已供訪客客流使用。因應西貢本身嘅定位同限制，本來就唔應該承受更多大型住宅發展。但城規會、規劃署審視規劃申請時，根本無認真考慮過呢一點。宜家西貢居民又要因政府嘅疏忽，承受居住環境被破壞嘅惡果。

雖然擴闊至四線，的確能令公路容納更多車流，但並不會有效地改善整體嘅交通問題，因為最後只會吸引更多人（尤其訪客）揸車出入。綜觀外國先例，雖然公路擴闊後行程初期會快左，卻往往會因條路闊左、吸引更多人選擇揸車，而又好快飽和。以不斷起路、擴闊去改善塞車問題，就好似燈蛾撲火，最後都好可能係事倍功半。條路太多車，就好似不斷食、撐大左個胃，又再食更加多，形成一個惡性循環，稱為「供給誘導需求」(Induced Demand)。

與其擴闊公路，其實有幾個更加有效嘅辦法，去改善西貢公路塞車嘅問題：

泊車轉乘計劃：鼓勵大家泊低架車、轉巴士出入西貢。當區區議員何偉航曾經同運房局提出建議，但局方表示不可行，因為西貢公路無大型集體運輸系統。（巴士：Am I a joke to you?）如果加強現時公共運輸服務，喺區內外尋覓適當場地作泊車轉乘設施，再附以路線直接、班次頻密嘅巴士路線接駁，相信吸引力極高。

沿路設單車徑：西貢公路長 6.1 公里，由沿途村落踩單車往返西貢市，只需半個鐘左右。若有單車徑，更多西貢居民就能夠以單車代步，從而減少繼續揸車嘅誘因。少左人揸車，塞車得以舒緩，公共運輸嘅可靠性同吸引力亦都會提高。呢個良性循環，不單能夠減少碳排放，仲可以減少環境破壞同噪音污染。

局部改善樽頸位：何偉航指出，只需喺沿線十個位置進行局部改善工程，已經能夠處理樽頸位，同埋減少巴士小巴上落客對流量嘅影響。

雖然西貢公路現時真係好塞，擴闊至四線彷彿係最直接嘅解決辦法。但西貢公路沿途有唔少林木同濕地，擴闊工程必定會破壞西貢寶貴嘅生態和鄉郊面貌。工程亦需要向沿線嘅村落收地，將對居民生活造成重要影響。再講，西貢市中心嘅泊位一直緊拙，若擴闊後勢必有更多車進入西貢市，將市內嘅泊車、塞車問題加劇。

西貢區需要停止過度發展，並且積極鼓勵使用公共運輸往返，才能真正改善公路擠塞、以至西貢市嘅交通問題。

參考資料：

【西貢塞車】師奶組隊數車計流量 向城規會反狂建新樓 （香港01）
新地西貢十四鄉項目倍增至9,500個單位 申請獲城規會通過（香港01） 
路變窄一定塞到死？路拓寬一定好順暢？供給誘導需求（高雄好過日）
A Great Big Freeway — Thanks to Induced Demand (StreetBlog USA) 
西貢暢達交通不是夢 — 擴闊道路不是唯一答案（工黨何偉航） 

Justin Yim medium 
街道變革 Street Reset