今日收到消息後，開會時竟然哭了。買了一打小蛋糕，就飛車去了毒果老家。

我早已離開壹傳媒，但這裡對我而言，像母校。

入大門，剛好踫到七年前請我的 S 小姐。她帶我入行，讓我這種笨孩子吃到第一口飯。

這張相是剛剛影的，二樓大堂掛著「辛苦晒！各位同事！」。

帶著甜點四處遊走，財經部的 C 小姐衝過來，眼紅紅，抱一抱。

同屬財經的 F 小姐和 H 先生拍拍我肩，盡在不言中。

走上果籽部門，和 I 小姐打聲招呼，她正埋首為同事處理工作，務求人人盡量過得好。

動物版記者 A 小姐，一見我就爆喊，抱抱，我們相識七年了，由細睇到我大。

咁啱撞到 B 經理，他是我好朋友，約埋上五樓飯堂買燒味。

收銀姐姐一見我就尖叫，佢勁鍾意我，貪我醜樣。

飯堂姐姐又大叫「做咩返嚟啊？探我呀？」，唔知點解，我同姐姐們好熟。

舊同事們在大堂合照，又有一組組人忙著開會，一如以往。

明天還有《蘋果》吧，有稿要寫，有紙要出。

這是壹傳媒大樓的日常，嘢照做，係灰，但無時間灰。

今日，好多人攬住我喊。喊完，寫稿度橋，默默勞動。

為的，是《蘋果》一息尚存，大家有新聞睇。

張劍虹先生的房間，無人在席。

黎智英先生的房間，虛位已久。

日報，日日報，報到最後一步，報到無得再報。

做過毒果人，是我的榮幸。

延伸閱讀：
【打壓壹傳媒】重新定義「新聞自由」：打壓《蘋果》，是為了新「一國兩制」鋪路。