【文:「言」燒爸】

全城力撐香港運動員出戰奧運，熱血沸騰投入之餘亦熱血鬧爆某某盲目批鬥，影響港隊羽毛球一哥伍家朗表現，「飲恨」今屆奧運。及後網上湧現大量發文支持家朗同事件分析，亦有某啲扮專家嘅話「件衫唔同又會影響到比賽表現咁迷信?」講到運動員「迷信」，筆者咁啱睇到體育界KOL伍家謙先生社交平台一篇有關運動心理學嘅發文，想同各位分享。

文中提到佢自己曾經請教運動心理學專業人士，講到好多運動員為保持最佳表現或改善缺點，都會建立一套「習慣」(Routine) 。例如有 NBA 球員射罰球前會有既定動作，筆者偶像 Jason Kidd 就會每次射罰球前向籃框送上飛吻。研究者指出，當運動員執行 Routine 時，可以提高穩定性，聚焦於當下比賽，提高運動表現。Moran (1996) 提出Pre-Performance Routines「賽前例行性動作」，意思係「運動員在執行某特定運動技能前，所從事一連串系統化的想法與行動」。提到運動心理學，原來佢哋為提升表現，亦會經常進行意象訓練 (Visualization)，”a way of conditioning for your brain for successful outcomes”，同樣原理又可唔可以應用於商界呢?

試想像你即將要去見一個大客，又或者準備入 board room 同管理層做一個重要 presentation，跟住你一路行，一路心跳加速，身體開始震，思緒開始亂。咁嘅情況其實除左深呼吸，有冇其他方法? NLP 身心語言程式學中，有一個好出名技巧就叫做正面心錨 (Positive Anchoring)，想像吓你身上有個「掣」，隨時一㩒狀態會連結到正面感知，例如自信、開心、放鬆等，正所謂狀態影響行為，表現亦會變得更理想。點解會咁神奇? 因為人腦就係咁神奇，思想、感受會受五感接受嘅信息影響，所以當你聽到某首歌的前奏一出，你腦海會呈現一幕幕畫面; 聞到一絮熟悉的香水味，你會回想起與某人的一些經歷; 路過母校，細個回憶會翻晒嚟!

建立正面心錨看似簡單但講求專注同不斷訓練自己五感，此外，筆者建議大家釀成「儲貨」習慣，儲咩貨？就係令自己有理想狀態嘅經歷，如果你係管理銷售團隊，亦要於例會中建立分享成功故事的環節，用問題技巧鼓勵同事詳細分享，因為每一次當同事毫不掩飾地分享，佢個腦其實再一次回憶成功經驗，有助加強正面感受！分享個人成功故事想更引人入勝，助人助己?可以參考之前的文章<從Mirror 狂熱看你不得不學的「英雄旅程」故事法>

祝大家生活中、工作中經歷及儲存多點 Yes Moment，保持心理健康，繼續追尋夢想，亦繼續支持我哋香港運動員！

作者簡介：熱愛培訓事業的 80 後，推崇棟篤笑式演講風格。喜歡透過言語感染其他人，專長於團隊合作、銷售技巧及個人突破培訓，於上市公司擔任高級經理，曾獲業界獎項。最初視別人為培訓對象，後來發現自己才是學員。現在人生目標是為兒子立下對生命熱誠的榜樣