亞視欠薪未執法 梁國雄轟張建宗：有冇執行力呀？
立場新聞 2015/01/26 14:24
社民連立法會議員梁國雄批評勞福局長張建宗，在亞視欠薪事件上未有執法，是天大醜聞，指摘張「你有冇執行力呀！」
勞工及福利局局長張建宗今日下午出席立法會福利事務委員會會議，介紹《施政報告》，發言時揶揄議員本月16日「7時22分」才通過低收入家庭津貼，暗指有議員拉布阻礙通過津貼。
有份拉布的梁國雄發言時就增加朝八晚八託兒名額質詢張建宗，並借機批評他態度輕佻，質問「咁邊個阻住你做全民退休保障呀！」，又轟勞福局在亞視員工被拖糧一事上未有執法：
「亞視你拉唔到人已經係天大醜聞嚟啦！你今日又嚟呢度，亞視又邊個阻住你張建宗執法呀！係咪司長呀？樣樣都做唔到！一步之遙呀！行一步咋！亞視你拉唔到人，你講呢樣都嘥時間啦！你有冇執行力呀？執法呀哥！幾時喺亞視拉人呀！」
梁國雄又繼續批評：
「你正話喺度調侃我哋，話唔知咩7點22分通過低津？阿哥，等你個全民退休保障等到好多人，而家喺天堂望落嚟睇住你呀。你小心呀。
你講乜嘢呀？咁輕佻？話我哋阻住你個低津？咁邊個阻住你做呢個全民退休保障呀？邊個阻住你呀？阿哥。我2013年開始拉布，2014年（政府）就叫周永新教授整個研究，2015年又話周永新教授個研究唔得。死晒呀你哋？」
就退休保障問題，人民力量陳志全亦諷刺政府「傾到天荒地老」，現在又要回頭討論退保是福利救濟還是權利，還要尋求共識，認為「一定冇共識」。