李輝自稱「impact factor」二百倍於陳文敏 方志恒、沈旭暉齊轟錯用指標
立場新聞 2015/10/04 23:17
港大教育學院副教授李輝今天在城市論壇，自稱「根據全球學術界最權威的impact factor（影響因子）來計算」，他的影響因子是港大前法律學院院長陳文敏的200倍，所以校委會成員批評陳文敏的學術地位「不夠班」，不能說是妖言惑眾。但教育學院亞洲及政策研究學系助理教授方志恒今晚在facebook指出，「所謂Impact Factor，係用嚟統計某一份學術期刋嘅文章嘅被引用次數，換言之係以「期刊」做統計單位」；方志恒不明白李輝如何可以幫自己及陳文敏，計算出以「個人」做單位的Impact Factor：
「所謂Impact Factor，係用嚟統計某一份學術期刋嘅文章嘅被引用次數，換言之係以「期刊」做統計單位；呀李龜博士唔知有乜特異功能，可以幫佢自己同陳文敏教授，計左以「個人」做單位嘅Impact Factor出嚟。
其實呀李龜博士又Google又Research，冇奶油連維基百科都唔識搵㗎，咁等盡人事我幫搵你搵埋嘞，有齊中英文版本添。
https://en.m.wikipedia.org/wiki/Impact_factor
https://zh.m.wikipedia.org/wiki/影响因子 」
( 方志恒facebook專頁 )
李輝今天說，有用google 及做research，發現陳文敏論文的引用率很低，「根據全球學術界最權威的impact factor（影響因子）來計算，陳文敏平均每年的影響因子是0.0038，他從事學術研究21年，我剛於2000年開始，15年教齡，我的影響因子超過0.05，是陳文敏的200倍。請你google search，睇impact factor。」
此外，國際關係學者，香港中文大學社會科學院副教授沈旭暉，昨晚亦在Facebook揶揄李輝，指影響因子「只供學術期刊參考，唔係比古龍小說排武林高手咁排個人排名，更唔可能比較唔同界別既期刊」，他又質疑「每個discipline都有唔同既準則，點可以越俎代庖評論人地行頭既江湖地位？」沈旭暉亦以「唔通人生就無其他成就？」諷刺李輝，同時不忘嘲笑其帶口音的廣東話：
「我對成個遊戲好反感，但係出學術文既期刊，好似都有好高『影響煙子』，例如上篇出既《Journal of Contemporary China》有0.953幾乎全field最高，之前既《China Quarterly》、《Pacific Review》、《Pacific Affairs》之類都好爆，目的只係防身，有無聊人搞事時候擋兩野，但從來唔覺得係成就，自己提只會比人笑。至於比人search幾多次，只係編輯關心既事。估唔到有人會當係個人『影響煙子』，唔通人生就無其他成就？
我討厭政治，只係反感高學歷既人夜郎自大，我應承咗自己，絕對唔會無了期浪費時間喺呢個遊戲、呢個地方。世界好大，夏蟲不可語冰，唔好比個種視野、環境limit我地既天空，大家努力。我喺巴黎，講完晒啦，au revoir。」