你哋而家咁嘅情況（指記者圍訪），就造成嗰晚嘅事情發生。

我想話，齊昕係一個好好心地、好善良、好鍾意動物嘅細路女，佢好保護、好關心佢嘅朋友，嗰晚佢同幾個朋友喺一間餐廳慶祝萬聖節，離開時佢朋友想叫架車返屋企，但一行出餐廳，有四五十個記者圍住蜂擁上去影相，佢哋根本截車都截唔到，係佢朋友打電話叫我搵架車落去接佢。

我想話畀大家知，當我架車去到，個場面係混亂過而家幾倍，有四五十個人圍住我架車，仲有傳媒朋友，拉開我車門想衝上車，齊昕朋友扶住佢上車，你哋嘅朋友（傳媒）四五十個湧埋嚟圍住佢，中間有啲推撞，齊昕想保護朋友，唔想你哋影到佢朋友，我深信佢嗰晚有啲飲醉酒，嗰晚嘅行動唔係想冒犯任何人。

而事後，有啲傳媒報紙報道有啲粗口講過啲嘢，我喺現場係聽唔到，我喺呢度想呼籲大家傳媒朋友，請你哋畀啲空間畀佢。無論傳媒朋友、網上朋友，無論你哋對而家嘅現狀、政制有幾咁唔滿意都好，齊昕係無辜嘅，更多唔關佢朋友事，請你哋以後喺佢嘅活動，尤其是私人活動，唔好騷擾佢。佢嘅情緒，係需要休養，ＯＫ？請你哋畀啲空間佢，多謝大家。