【港中大戰】曾俊華fb貼相 羅馬尼亞看球賽直播 網民：可惜菲律賓睇唔到
立場新聞 2015/11/17 22:24
曾俊華 facebook 截圖
曾在離港前表示撐港隊的財政司司長曾俊華，近日出席土耳其20國集團峰會，人不在港，但仍然心繫今晚的港中大戰。完場之後，財爺在 facebook 分享越洋睇波相片，並形容球賽刺激 (Exciting match!)，有網民留言「可惜菲律賓睇唔到」，暗串特首梁振英今日多次迴避評論港中大戰，更指自己身在馬尼拉無法子看直播。
曾俊華上周離港出席土耳其 G20 峰會，行程今日到羅馬尼亞布加勒斯特，香港時間晚上 10 時多，其 facebook 上傳一張財爺用平板電腦睇波的相片，寫上「Exciting match! @Bucharest, Romania」。
帖子發佈 15 分鐘，吸引超過三千人按讚，接近五百個轉載。網民留言，比較同樣出訪，現正身處菲律賓的特首梁振英，全日迴避媒體追問評論球賽的態度：
「財爺咁忙都睇波，抵讚！你好過響菲律賓的上司無時間唔睇波。」
「羅馬尼亞都睇到，菲律賓睇唔到，笑死人。財爺好嘢！！」
「菲律賓上網可能差過羅馬尼亞呢，你地諗多左喇」
今年九月，世界盃亞洲區外圍賽港隊迎戰卡塔爾一役，曾俊華曾親身到場支持香港球員，並在 facebook 發帖評論「Good match！香港好波！」。