反網絡廿三條 黃偉文 ：請大家掛念可能要坐監的我！
立場新聞 2016/01/01 21:44
在元旦舉行的叱咤樂壇頒奬禮中，黃偉文再奪填詞人大獎，他在台上發表得獎感言時，表明自己反對網絡廿三條。他指自己的詞作《羅生門》也是二次創作，若網絡廿三條通過，政府便可以「繞過自己代表自己來告自己」，他指到時自己可能便要坐監。他最後又表示，無論是一次二次三次以至 N 次，他都會繼續堅持創作他最愛的廣東歌詞。
黃偉文稱，隨住年紀增長，每次上叱咤頒獎台都覺得是最後一年，但原因不是因為自己年老。他說自己今次寫了一首很受歡迎的歌，名叫《羅生門》，但這首歌又用了舊作《耿耿於懷》和《念念不忘》歌詞，因此，「嚴格來講，羅生門也是二次創作。」
黃偉文藉此表明自己反對網絡廿三條。「以前的世界無咁複雜，因為歌詞版權屬我自己，我是改我自己歌詞，只要我自己不告我自己，我就無事。」然而他又稱，若政府通過版權修訂法，以後若他再改詞，情況就不同了：「就算我唔告我自己，政府都可以繞過我自己，去代我自己來告我自己。」
他坦言，這才是自己今年可能最後一次上叱咤頒獎台的原因：「所以，你話今年係咪好有機會我係最後一年嚟叱咤呢？如果出年我真係唔喺度，希望大家會掛住我。」這番說話暗示如果版權修訂法通過，創作人可能以身試法，被逼入獄。黃最後結語:「不過，我可以應承大家，無論嚟緊嘅日子，我喺壁屋、小欖、喜靈洲、芝麻灣；無論一次、二次、三次定係 N 次，我都會堅持創作，我最愛嘅廣東歌詞。」
現場掌聲雷動。
由商台 903 DJ Colin 拍攝的現場片段：
2015年叱咤填詞人大獎：黃偉文「<羅生門>都係二次創作，所以好有可能係佢最後一年上叱咤台！」
Posted by Colin Mak on Friday, January 1, 2016
以下為黃偉文得獎感言筆錄：
可能年紀大左，每次上叱咤頒獎台都覺得係最後一年。並唔係因為年紀大，覺得身體唔好，或者唔係幾參加頒獎禮，而係因為過去一年，我寫了一首歌，叫《羅生門》，其實同十一年前嘅《耿耿於懷》、《念念不忘》、《瑕疵》成個組曲，係同一首歌嚟嘅。而《羅生門》呢，有一個好特別嘅地方，佢角色嘅設定、用字、關係、甚至係旋律同歌詞，係完全來自《耿耿於懷》同《念念不忘》嘅。所以嚴格嚟講，《羅生門》係二次創作嚟嘅。（全場鼓掌）
以前嘅世界就無咁複雜嘅，因為《耿耿於懷》嗰批歌嘅版權持有人都係我自己，旋律都全部係我啲朋友，應該就唔會搞我嘅。所以我改我嘅歌詞，只要我自己唔告我自己，就無人會告我自己嘅。但嚟緊嘅版權修訂法如果真係通過咗之後呢，如果我改我自己嘅歌詞，就算我自己唔告我自己，政府都可以跳過我自己，代表我自己嚟告我自己。（全場再鼓掌）
所以，你話今年係咪好有機會我係最後一年嚟叱咤呢？如果出年我真係唔喺度嘅話，希望大家會掛住我。不過，我可以應承大家，嚟緊嘅日子，無論我喺壁屋、小欖、喜靈洲，定係芝麻灣，無論一次、二次、三次定係N次，我都會堅持創作，我最愛嘅廣東歌詞。（全場歡呼鼓掌）