港珠澳橋撥款剪布惹批評 陳健波：老細畀嘢我做都要知期限
立場新聞 2016/02/01 11:05
陳健波，圖片來源：nowtv片段截圖
在政府未能解答議員大部分有關港珠澳大橋工程的疑問下，立法會財委會周六仍通過相關工程的54億元追加撥款申請，財委會主席陳健波今早再次解釋「剪布」舉動，指政府設下的期限需要尊重，但這不影響他主持會議的工作，並舉例指「老細畀樣嘢我做，當然我都會問個期限係幾時啦」，但隨即稱「當然政府唔係我老細」。至於作為主席臨表決前呼籲議員投贊成票，陳健波辯稱，只是回應金融服務界議員張華峰的提問，可惜被在旁秘書的米高峰收音，他再次為此致歉。
陳健波今早分別出席多個電台節目，解釋周六會議的處理手法。他聲稱，已經盡量跟足議事規程及法例去做，在陽光下剪布，期限是重要考慮因素，整個過程有法律顧問監察，他每一步都跟足法律要求去做，並無用盡主席的權力，要在幾方面取得平衡，包括議員發言權、工程延誤引起的公眾損失。他又指政府設下的期限需要尊重：
「即係我哋做嘢，日常做嘢都係咁，譬如老細畀樣嘢我做，當然我都會問個期限係幾時啦，當然政府唔係我老細啦，但我只係想同大家講，日常返工，你上司交啲嘢畀你做，你都會講個期限係點。所以我哋做呢啲工程，一定要知道，咩情況下、幾時會令香港有好重大損失......
政府就可以講佢自己要講嘅嘢，佢喺佢個位，佢緊張，驚啲工程係啱嘅，但佢唔可以影響到我個決定...（主持：但而家就正正似乎係你見住個期限，趕住剪布喎。）期限就一定要尊重嘅，除非你唔信政府啫。正如我講，你做嘢梗有個期限吖嘛，點解可以唔理期限？所以期限係我哋剪布嘅重要考慮。」
另一個惹來爭議的地方，是陳健波在臨表決前一刻，曾經多次叫議員投贊成票，被質疑不中立。陳健波今早解釋，當日情況混亂，只剩幾十秒就結束投票，議員張華峰問他是就那一個項目投票，由於他已知張華峰的投票意向，所以只答贊成，但出來的效果就好樣他呼籲所有議員投贊成票。陳健波對事件引起公眾對主席的中立性產生疑慮道歉：
「你知我哋表決要等一分鍾㗎，咁當時呢，張華峰議員就問我『係咪投呢項』咁樣，咁我要覆佢嗰時，個咪已經畀人扯走咗，主席根本連個咪都冇咗喇，咁我就同佢講『係呀，就係呢個項目』。因為我哋剛剛投咗80幾項，係否決嘅，佢就驚係講緊修正案，佢驚係咪真正我哋要撥款嘅建議呢，佢就問我，咁其實係我同佢之間個對話嚟啫，但好可惜隔離秘書個咪就收到呢個訊息，就播咗出去啦吓，咁變咗大家就以為我叫所有議員一定要投贊成，其實我完全唔係咁嘅意思。
但我相信呢件事都惹起大家嘅疑慮，我喺呢度同大家道歉嘅，因為我覺得，就算我個原意唔係咁，但個結果就係咁樣，咁人哋梗係覺得我好似影響咗個主席嘅公正性，咁所以我需要同大家道歉。不過我衷心同大家講，我係完全無意教啲議員點投票，就算係啲議員都唔會聽我講啦。但一個主席喺呢啲場合，如果我真係咁做，梗係唔啱啦，我都希望大家明白係無心之失嚟。」
另外，陳健波表示，一定不會在本月內就高鐵追加撥款申請表決。他稱，政府要處理好高鐵項目，包括一地兩檢安排、確保不會有執法人員來港執法等，又估計今次不但有數名議員拉布，形容主持有關會議十分困難。陳健波承認，在議會外與政府官員有溝通，不認同其他人指，議員與政府官員不應該溝通，他覺得只要不是利益方面的溝通，便沒有問題。