DSE考生去錯試場 衞理中學校長全力相助 「除了讀書，幫人都好重要」
立場新聞 2016/04/15 17:02
DSE歷史科今日開考，有考生一時胡塗，竟然弄錯了考試場地。在情急之下，該考生走到小西灣的衞理中學求助，幸得該校校長藍正思出手協助，更借錢予學生搭的士赴考場。該學生最後順利完成試卷，特意在「名校 Secrets」專頁中感謝校長協助。藍正思校長接受《立場新聞》訪問，表示學校一直鼓勵同學幫助別人，「除了讀書要俾心機，個人品格、肯唔肯幫人都好重要」。
考生去錯試場 校長借500元相助
「名校 Secrets」專頁今日流傳的文章可見，一名DSE歷史科考生今日弄錯了考試場地，幸獲衞理中學校長藍正思幫助。文章全文如下：
如果有衛理中學嘅同學，麻煩你地幫我同你哋嘅校長講聲多謝，同埋恭喜你地有一個咁好嘅校長。
話說，今日係考DSE嘅歷史，我都好早起身，食咗個早餐打算去試場，當我到咗嶺南衡怡中學，發現原來自己去錯咗地方，睇錯左經濟嘅考試場地。跟住我好急咁去咗隔離間衛理中學，見到個校長用關心嘅眼光望住我，問我有咩事。我就好心急咁問呢度有冇得考試，佢話冇，跟住問我發生左咩事。我就同佢講，我去錯左試場，但係原本嘅試場實在太遠，我應該趕唔切開考之前到；跟住佢帶咗我入校務處，叫個副校長幫我打電話去考評局問下小西灣同柴灣邊度有得考，佢就係啲校長gp幫我問，仲一邊安慰我叫我冷靜。
之後考評局個邊話，成個東區得蘇浙公學有得用中文考歷史，之後個校長就急急腳話同我搵的士，但係我銀包已經冇錢，所以我同佢講我唔想去考。佢知道我無錢之後，就立即入校長室攞佢個銀包，比＄500我話借比我，之後推左我入的士。最後我都只係遲到左十分鐘，好彩都做得切份卷。
我真係好多謝嗰位校長，如果我歷史真係有5，都係要多謝你，係你唔計較我係咪你嘅學生，更加唔計較係咪第一次見我，就好直接咁幫左我。係你嘅身上，我見到人性嘅光輝同埋為人師表嘅精神。
多謝您。
追加：
衛理中學真係好warm，啱先考完試即刻去還錢，由看更停行到入校務處，見到嘅人都問我趕唔趕到，考成點。呢間中學真係好好。
藍正思：希成年人助考生渡困難時刻
衞理中學校長藍正思今日接受本網訪問，證實有關事件，對於該考生最後能順利完成考試感到很高興，「對於我來說是好小事，但如果她考不到，對之後的科目都會有很大影響」。
藍正思又指，學校一直重視學生品格發展，他認為既然如此教育學生，自己同樣要以身作則。「除了讀書要俾心機，個人品格、肯唔肯幫人都好重要。我們學校常說要愛人、愛己，就是要幫助別人。其實幫人好簡單，不用太複雜…例如下雨時身邊的同學沒有帶傘，你遮一下別人，是舉手之勞，但已經幫助到別人」。
藍正思又認為，部分DSE考生如果遇到困難，認為沒有辦法就會想放棄，「希望成年人，陪他們渡過困難的時間，他們過到這一關，就會知道原來並不是沒有辦法」。
翻查資料，藍正思曾經在2012至2013年度獲頒行政長官卓越教學獎。當年他仍在浸信會永隆中學任教，他認為師生對學校的歸屬感不足，於是決定於教師層面建立「教師支援網絡」，推行朋輩輔導工作。